تاجیکستان به مهاجران افغانستان ۱۵ روز فرصت خروج داد.
منابع محلی می‌گویند دولت تاجیکستان به مهاجران افغانستانی ۱۵ روز فرصت داده تا خاک این کشور را ترک کنند. در هفته‌های اخیر، بازداشت و اخراج اجباری پناه‌جویان افغان در این کشور افزایش یافته است.
به گفته منابع، بسیاری از مهاجرانی که اخراج شده‌اند، دارای مدارک قانونی اقامت بوده‌اند. در حال حاضر، بیش از ۱۳ هزار شهروند افغانستان در تاجیکستان زندگی می‌کنند. بیشتر آن‌ها منتظر نهایی شدن پرونده‌های مهاجرتی‌شان از سوی دولت کانادا هستند.
بخش بزرگی از این مهاجران را کارمندان دولت پیشین افغانستان تشکیل می‌دهند که پس از تسلط طالبان، برای نجات جان خود به تاجیکستان پناه برده‌اند.
براساس گزارش‌ها، دولت تاجیکستان تنها در یک هفته‌ی گذشته ده‌ها مهاجر را، بیشتر بدون اطلاع قبلی و از محل کارشان، بازداشت و به افغانستان بازگردانده است. بیشتر آن‌ها در شهرک وحدت و ناحیه رودکی در حومه شهر دوشنبه، پایتخت تاجیکستان، زندگی می‌کنند.
هم‌زمان با این تصمیم تاجیکستان، کشورهای ایران و پاکستان نیز روند اخراج مهاجران افغان را شدت بخشیده‌اند و روزانه صدها نفر را به افغانستان بازمی‌گردانند.
