درگیری مرزی طالبان و مرزبانان تاجیکستان در بدخشان.
منابع محلی در ولایت بدخشان از وقوع درگیری مرزی میان نیروهای گروه طالبان و مرزبانان تاجیکستان خبر داده‌اند.
این رویداد روز شنبه، سوم عقرب ۱۴۰۴، در روستای داونگ از مربوطات ولسوالی شهربزرگ بدخشان رخ داده است.
به گفته منابع، درگیری زمانی آغاز شد که دو طرف بر سر تغییر مسیر آب رودخانه آمو دچار اختلاف شدند. این منطقه در نزدیکی پروژه‌های استخراج طلا موقعیت دارد که شرکت‌های چینی نیز در آن فعالیت دارند. منابع محلی می‌گویند در این درگیری تلفات به‌جا مانده، اما رقم دقیق آن تاکنون مشخص نشده است.
مقام‌های تاجیکستانی در مورد این رویداد ابراز نظر نکرده‌اند. همزمان گزارش‌ها حاکی است که مقام‌های طالبان نشستی را با اسماعیل غزنوی، والی تازه‌گماشته این گروه برای ولایت بدخشان، برگزار کرده‌اند. طالبان و نیروهای مرزی تاجیکستان پیش‌تر نیز در ولسوالی شهربزرگ درگیر شده بودند.
