مجاهد: معاش رهبر طالبان ۲۰ هزار افغانی است.
ذبیح‌الله مجاهد، سخنگوی طالبان، در گفت‌وگویی با یک رسانه محلی گفته است که رهبران طالبان ماهانه ۲۰ هزار افغانی معاش دریافت می‌کنند و «تا نیمه‌های شب» کار می‌کنند.
او افزود که هبت‌الله آخندزاده، رهبر طالبان، به چند ولایت سفر کرده و با مردم دیدار داشته است. مجاهد گفته هبت‌الله علاقه‌ای به رسانه‌ها ندارد و نمی‌خواهد در تصویر ظاهر شود. به گفته او، رهبر طالبان «زندگی ساده» دارد و دیدار با او آسان است.
سخنگوی طالبان همچنین تأیید کرده که عبدالرحمن، پسر بزرگ هبت‌الله، در دوران جمهوریت در هلمند حمله انتحاری انجام داده است. او گفته فرزندان دیگر رهبر طالبان اکنون مشغول تحصیل‌اند.
این سخنان در حالی مطرح می‌شود که بخش بزرگی از افکار عمومی در افغانستان و شماری از سیاستمداران باور دارند ملا هبت‌الله سال‌هاست زنده نیست و طالبان تنها یک عکس از او را منتشر کرده‌اند.
