سفر هیأت طالبان به اوزبیکستان برای شرکت در کنفرانس بین‌المللی تاشکینت
نورالدین عزیزی، سرپرست وزارت صنعت و تجارت طالبان، در رأس یک هیأتی برای شرکت در چهارمین کنفرانس بین‌المللی سرمایه‌گذاری تاشکینت، عازم اوزبیکستان شد. در این سفر، مولوی احمدجان بلال، رئیس عمومی شرکت‌های امارتی نیز او را همراهی می‌کند.
این سفر به دعوت رسمی دولت اوزبیکستان انجام شده و هدف آن پیگیری توافق‌های پیشین و گسترش همکاری‌های اقتصادی میان دو کشور عنوان شده است.
در این رویداد اقتصادی، نمایندگانی از حدود ۱۰۰ کشور حضور دارند و قرار است هیأت طالبان در حاشیه نشست با مقامات کشورهای مختلف گفت‌وگو کرده و در نمایشگاه محصولات داخلی اوزبیکستان نیز شرکت کند.
