طالبان کنسول افغانستان در خاروغ تاجیکستان را برکنار کردند.
منابع مطلع در تاجیکستان گزارش میدهند که طالبان کنسول افغانستان در ولایت خاروغ را که با این گروه همکاری میکرد، از سمتش برکنار کردهاند.
به گفته این منابع، نقیبالله دهقانزاده، دیپلمات حکومت پیشین افغانستان که پس از تغییر قدرت با طالبان تعامل داشت، رسماً از وظیفه کنار گذاشته شده است.
بر بنیاد اطلاعات بهدستآمده، وزارت امور خارجه طالبان از تاریخ ۱۵ دسامبر ۲۰۲۵ مأموریت دهقانزاده را خاتمه داده و همزمان فعالیت کنسولگری افغانستان در خاروغ را به حالت تعلیق درآورده است.
منابع همچنین میگویند که دهقانزاده مبلغی در حدود ۱۲۰ هزار دالر امریکایی را به وزارت خارجه طالبان تحویل داده است؛ موضوعی که جزئیات آن بهگونه رسمی اعلام نشده است.
به گفته منابع، این تصمیم در شرایطی گرفته شده که دهقانزاده در تلاش بود با حمایت طالبان، بهجای ظاهر اغبر بهعنوان سفیر افغانستان در تاجیکستان معرفی شود.
این در حالی است که دولت تاجیکستان همچنان از بهرسمیتشناختن طالبان خودداری کرده و تاکنون هیچ نمایندهای از این گروه را در سفارت افغانستان در دوشنبه و کنسولگری خاروغ نپذیرفته است.
